അനിയത്തി

മഞ്ഞു പെയ്യുന്ന ഒരു ഡിസംബറിൽ എനിക്ക് കിട്ടിയ വിലപിടിച്ച സമ്മാനമായിരുന്നവൾ.

ഞാൻ ആദ്യം കാണുമ്പോൾ ഒരു റോസാപ്പൂ ഇതൾ പോലെ  ഉമ്മിച്ചിയോട് പറ്റിചേർന്നു കിടന്നവൾ.

ആദ്യ കാഴ്ചയിൽ തന്നെ എന്റെ മനം നിറച്ചവൾ.

അവളെ ഞാൻ ആദ്യമായ് കണ്ടപ്പോൾ കൈകൾ മുറുകെ പിടിച്ചു കണ്ണുകൾ ഇറുക്കെ അടച്ചു ഉമ്മിച്ചിയോട് ചേർന്ന്
കിടന്നവൾ.

ആദ്യമായ് ഞാൻ ആ കുഞ്ഞിളം കൈകളിൽ ചുംബന പൂക്കൾ നൽകിയപ്പോൾ മുറുകെ പിടിച്ച കൈകളാൽ അവൾ ഞെരിപിരി കൊണ്ടതും ഓർമയുണ്ട്.

അവൾക്കന്നൊരു ഓറഞ്ചിൻ ഗന്ധമായിരുന്നു.

വലിയ കണ്ണുകളും ചുരുണ്ട മുടിയും ഉള്ള ഒരു കുഞ്ഞു മാലാഖ.

ഒരു അമ്മയുടെ കരുതൽ എനിക്ക് വന്നതും അവളിൽ നിന്നാണ്.

കണ്ണെഴുതിച്ചും മുടി കെട്ടിയും കുളിപ്പിച്ചും ഞാനും ഒരു ചെറിയ അമ്മയെപ്പോലെ ആവുകയായിരുന്നു.

എന്നോടൊരിക്കലും രഹസ്യങ്ങൾ ഒന്നും ഒളിക്കാത്തവൾ.

പങ്കു വയ്ക്കൽ മനോഹരമെന്നു പഠിച്ചത് തന്നെ നിന്നിൽ നിന്നാണ്.

കൊച്ചു കൊച്ചു പിണക്കങ്ങളും വലിയ ഇണക്കങ്ങളുമായ് കൂട്ടുകാരി ആയവൾ.

കാലത്തിൻ പേമാരി ആർത്തു തിമർത്തപ്പോൾ നീയും ആയൊരു മണവാട്ടി.

പടിയിറങ്ങി പോയിട്ടും വർഷങ്ങൾ കൊഴിഞ്ഞാലും എന്നും നീ എന്നുടെ കുഞ്ഞ് തന്നെ.