നോസ്റ്റാൾജിയ: ആദി

ഉമ്മായെന്ന് വിളിച്ച് കരയുന്ന നേരത്തും അടിയും, വഴക്കും കിട്ടിക്കൊണ്ടേയിരുന്നു.

എല്ലാം കഴിഞ്ഞപ്പോൾ,

"ഇനി ഞാനുമ്മയോട് മിണ്ടില്ല, ഈ വീട്ടിൽ നിന്നും ഒന്നും കഴിക്കില്ല, ആദി പിണക്കമാ" 

എന്ന പ്രതിജ്ഞയെടുത്ത് അടിയേറ്റ് വേദന കൊണ്ട് പുളയുന്ന ശരീരവും, മുറിവേറ്റ മനസ്സുമായി അകത്തെ മുറിയിലിരിക്കുന്ന നേരത്താണ്, അയൽ വീട്ടിലെ കൂട്ടുകാരന്റെ ഉമ്മ വന്ന് എന്റെ ഉമ്മയോട് ചോദിക്കുന്നത്,

"എന്താ നിന്റെ മോന്റെ അലർച്ച കേട്ടല്ലോ,

അവൻ വല്ല പോക്കിരിത്തരവും കാട്ടിയോ" !!
(നമ്മടെ കയ്യിലിരിപ്പ് പണ്ട് മുതൽക്കേ എല്ലാർക്കും അറിയാലോ)

ആ നേരത്താണ് എന്റെ മനസ്സിലെ കനലിനെ വെള്ളം കോരിയൊഴിക്കുന്ന വിധത്തിൽ ഉമ്മയുടെ മറുപടി.

"അത് ഞാനെന്റെ ഭ്രാന്തിന് അവനെ അടിച്ചതാണ് "

ഈ തല്ലിപ്പൊളി ചെക്കന്റെ കുസൃതി ഉമ്മയുടെ ഭ്രാന്തായിരുന്നുവത്രേ..!!